Акафист Пресвятой Богородице "Взыскание погибших"

Празднование 18 февраля (н.ст.)

Тропарь, глас 7

Радуйся, Благодатная Богородице Дево, во объятиях Своих Предвечнаго Младенца и Бога носившая. Проси Его дати миру умирение и душам нашим спасение. Сын бо Тебе, Богомати, вещает, яко вся прошения Твоя во благое исполнит. Сего ради и мы припадающе, молим Тя и надеющиися на Тя, да не погибнем, имя Твое именуем: Ты бо еси, Владычице, Взыскание погибших.

Кондак, глас 6

Не имамы иныя помощи, не имамы иныя надежды, разве Тебе, Пречистая Дево, Ты нам помози, на Тебя надеемся и Тобою хвалимся: Твои бы есмы раби, да не постыдимся.

Кондак 1

Избранное и дивное избавление нам даровася - Твой образ честный, Владычице, яко избавльшеся от погибели вечныя теплою к Тебе пред ним молитвою, благодарственное пение приносим Ти, раби Твои, со умилением зовуще: Радуйся, Благодатная Богородице Дево, всех погибающих спасающая.

Икос 1

Ангели и Небесныя Силы хвалят Тя, Богомати, яко скорую христиан Заступницу, Ты бо обрадовала еси у образа Твоего Тебе возглашающих сице:

Радуйся, яко Тобою вся вселенная светлыя радости исполняется.

Радуйся, яко Твоим предстательством скорби разрушаются.

Радуйся, погибающим нечаянное спасение.

Радуйся, уповающим на Тя милующая Матерь и покров.

Радуйся, уныние падших на радость прелагающая.

Радуйся, яко Тобою даруется исправление греховныя жизни нашея.

Радуйся, Благодатная Богородице Дево, всех погибающих спасающая.

Кондак 2

Вся Небесныя Силы дивятся, видящи Тя непреложную молитвенницу за христианы к Сыну Твоему. И мы, грешнии, осияваеми образа Твоего боголепным сиянием, от негоже даруется нам скорое поможение, недоумея славити Тя по достоянию, зовем: Аллилуиа.

Икос 2

Разум подаждь нам, погибающим в скорби нашей, Заступнице усердная, Ты бо объемлеши покровом милости Твоея во всякой нужде зовущих со умилением таковая:

Радуйся, в недоуменный час печали помыслы полезныя нам низпосылающая.

Радуйся, обуреваемых страстьми и болезнующих сердцем благодатно врачующая.

Радуйся, скорое преодоление греховных навыков.

Радуйся, прибегающих к Тебе от страсти пиянства избавляющая.

Радуйся, грешников к благодатней жизни возставляющая.

Радуйся, во всяких бедах наших скорая Утешительнице.

Радуйся, Благодатная Богородице Дево, всех погибающих спасающая.

Кондак 3

Сила Господа Иисуса Христа осени Тя, Владычице, ко взысканию всех погибающих в бедах и скорбех и Твоея помощи просящих: Тебе бо дадеся благодать всякия облежащия ны беды прогоняти, да, спасаемии Тобою, вопием Богу: Аллилуиа.

Икос 3

Имея к роду человеческому велию милость, Богоневесто, покрываеши покровом Твоея благости всех почитающих Тя и молящихся Ти о заступлении. Темже простри руку помощи и нам, вопиющим со умилением таковая:

Радуйся, поношения и клеветы отъемлющая.

Радуйся, неправедныя советы разрушающая.

Радуйся, от неправеднаго осуждения спасающая.

Радуйся, от уз и темниц избавляющая.

Радуйся, из изгнания возвращающая.

Радуйся, всем просящим у Тебе милости помогающая.

Радуйся, Благодатная Богородице Дево, всех погибающих спасающая.

Кондак 4

Буря бед и печалей житейских обдержит ны, Небесная Царице, мы же, надеяся на Твое предстательство, покланяемся чудотворней иконе Твоей, веруем бо, яко взыщеши нас погибающих и зовущих: Аллилуиа.

Икос 4

Слыша Господь Твоя о нас ходатайства, Богородительнице, исполняет Твоя прошения. Сего ради и мы, грешнии, в скорбех наших погибающии, взирая на Твою святую икону, дерзаем глаголати сицевая:

Радуйся, неплодных родителей всерадостное разрешение.

Радуйся, матерей скорбящих утешение.

Радуйся, сиротствующих незримое воспитание.

Радуйся, в грехи и нечистоту впадших исправление.

Радуйся, открывающая мудрость учения недоумевающим.

Радуйся, светлое Солнце, согревающее нас лучами милостей и щедрот.

Радуйся, Благодатная Богородице Дево, всех погибающих спасающая.

Кондак 5

Боготечней звезде подобну явила еси икону Твою святую, Богородице, в скорбнем мире жития сего заблуждшим, еюже осени и нас, в греховней тьме сущих, да вопием Спасителю нашему: Аллилуиа.

Икос 5

Видяще Твоя теплыя к Богу моления о всех страждущих и многоразлично недужных, ублажаем Тя, благословенная Целительнице наша, радостная приносяще Тебе похвалы сия:

Радуйся, врачами оставленных на Свое попечение приемлющая.

Радуйся, исцеляющая неисцельныя болезни телес наших.

Радуйся, от помрачения душевнаго скоро свобождающая.

Радуйся, озлобленная сердца покаянием и слезами врачующая.

Радуйся, скорби временныя ко исправлению нам посылающая.

Радуйся, из глубины греховныя нас извлачающая.

Радуйся, Благодатная Богородице Дево, всех погибающих спасающая.

Кондак 6

Восхваляют и славят Тя, Богородице Дево, пророцы, апостоли и вси святии, имже подражающе и мы, грешнии, предстоя святей Твоей иконе, вопием о Тебе Богу: Аллилуиа.

Икос 6

Возсияла еси милостивно благостынею к нам, Богородице, от невечерняго света Сына Твоего и Бога, Того бо лучами согреваеши всех труждающихся и обремененных, зовущих Тебе таковая:

Радуйся, Домостроительнице всеблагая, житие наше добре устрояющая.

Радуйся, благословение добрых житейский начинаний.

Радуйся, добрая девам Наставнице.

Радуйся, невест благая Украсительнице.

Радуйся, Подательнице мира душевнаго.

Радуйся, Ходатаице нам вечныя радости.

Радуйся, Благодатная Богородице Дево, всех погибающих спасающая.

Кондак 7

Хотящи явити токи чудес от святыя иконы Твоея «Взыскание погибших», повелела еси, Владычице, молебная пения пред тою совершати и получившим исцеление – проповедати милости, ради тоя иконы явленныя. Темже и мы не таим Твоих благодеяний, благодарно поюще: Аллилуиа.

Икос 7

Дивную и спасительную благодать показа нам Господь в явлении чудотворнаго образа Твоего, Богородице, сего ради, сподобльшеся неисчетных Твоих благодеяний, благоговейно лобызаем оный, благодарно взывающе Ти таковая:

Радуйся, изгибших чудесное обретение.

Радуйся, от хлада и мраза погибающих дивное спасение.

Радуйся, по молитвам матерей чада их охраняющая.

Радуйся, семейныя распри и раздоры утоляющая.

Радуйся, пострадавшим за истину скорое оправдание.

Радуйся, Предстательнице к Богу, мир от бед избавляющая.

Радуйся, Благодатная Богородице Дево, всех погибающих спасающая.

Кондак 8

Странники и пришельцы, дальнии и ближнии притекают в храм Твой, Пречистая Дево, и слезно молят Тя, Владычице: умилосердися о всех грешных и заблуждших, да не погибнем зле, но, спасеннии Тобою, возопиим Творцу всяческих: Аллилуиа.

Икос 8

Всех падших благодатно возставляющи, Заступнице всеблагая, исполни ныне прошение и нас, погибающих и возносящих смиренная моления наша, вопиющих Ти сицевая:

Радуйся, Радосте наша, образом Твоим нас утешающая.

Радуйся, не гнушающаяся всеми презренных и отверженных.

Радуйся, Отрадо всех правды ради гонимых.

Радуйся, Заступнице обидимых.

Радуйся, обидящих скорое вразумление.

Радуйся, всех грешных с Богом примирение.

Радуйся, Благодатная Богородице Дево, всех погибающих спасающая.

Кондак 9

Всеми Небесными Силами прославляемая, являеши, Небесная Заступнице, матернее милосердие всем притекающим к Твоему заступлению. Тако и нам, просящим ныне Твоея помощи, буди Радостию и Утешением, да благодарно вопием Богу: Аллилуиа.

Икос 9

Вития многовещанныя недоумевают о многообразных чудесех Твоих, Богородице, яже от святыя иконы Твоея совершаются. Мы же, сему дивящеся, глаголем Тебе сице:

Радуйся, многоразличных дарований просящим Подательнице.

Радуйся, сирых, вдовиц и убогих Питательнице.

Радуйся, немощныя старости подкрепление.

Радуйся, едина Надежда отчаянным.

Радуйся, молитвеннице теплая всех скорбящих и обремененных.

Радуйся, тихое пристанище бурями житейскаго моря утомленных.

Радуйся, Благодатная Богородице Дево, всех погибающих спасающая.

Кондак 10

Спасительное взыскание в погибели сущим присно даруеши, Богородице Дево, и наставляеши на путь спасения всех умиленно с сокрушенным сердцем поющих Создателю нашему: Аллилуиа.

Икос 10

Стенание и вопль наш, погибающих, услыши, о милующая Мати Господа нашего, да от бед и напастей Тобою избавляеми, вопием Ти благодарственная сия:

Радуйся, смирение в души наша вселяющая.

Радуйся, волны страстей греховных в сердцах наших утишающая.

Радуйся, о всех падших матерния слезы проливающая.

Радуйся, во святом житии верныя утверждающая.

Радуйся, благую христианскую кончину им подающая.

Радуйся, врата райская отверзающая.

Радуйся, Благодатная Богородице Дево, всех погибающих спасающая.

Кондак 11

Пение всеумиленное приносяще Ти, просим Тебе, Дево Богородице: не презри гласа рабов Твоих, к Тебе бо в погибели и скорби прибегаем и пред Тобою в бедах наших слезы проливаем, поюще: Аллилуиа.

Икос 11

Светоподательную свещу сущим во тьме греха и уныния зрим Святую Деву: освещаеши бо всю вселенную лучами чудес Твоих, имиже озаряеми, благодарная приносим Ти глаголы:

Радуйся, крепкое утверждение Православныя веры.

Радуйся, отечества нашего надежное заступление.

Радуйся, благочестивых правителей его помоще.

Радуйся, святителей и пастырей укрепление.

Радуйся, от междоусобий миром и любовию нас ограждающая.

Радуйся, от враг видимых и невидимых нас защищающая.

Радуйся, Благодатная Богородице Дево, всех погибающих спасающая.

Кондак 12

Благодать Божественную испроси нам у Сына Твоего и Бога, простри нам руку помощи, взыщи нас погибающих и приими в вечныя кровы, Богородительнице, да радующеся, поем Богу, Тобою нас спасающему: Аллилуиа.

Икос 12

Поюще Твоя чудеса, от иконы Твоея «Взыскание погибших» бываемая, веруем, яко даруеши радость и нам, сердцем и усты Тебе приносящим таковая:

Радуйся, христиан непостыдное упование.

Радуйся, верных спасительное прибежище.

Радуйся, ненадежных надеяние.

Радуйся, от всех бед скорое избавление.

Радуйся, отрадо в день смерти.

Радуйся, едина надеждо и по смерти.

Радуйся, Благодатная Богородице Дево, всех погибающих спасающая.

Кондак 13

О Всепетая Мати, вечную Радость миру Рождшая! Нынешнее приемши моление, избави нас от всякия нужды и печали, яви нам скорую Твою помощь и подаждь отчаянным отраду, страждующим - исцеление, падшим - возстание, погибшим - взыскание, да благодарно вопием Богу: Аллилуиа.

(Этот кондак читается трижды, затем икос 1 и кондак 1)